Reverendo in Christo patri, domino Yvoni, divina providencia abbati Cluniacensi, frater Rotbertus, humilis prior monasterii Mauziacensis, ordinis Cluniacensis, Claromontensis diocesis, ejusdemque monasterii Mauziaci Deo devotus conventus, ejus humiles et devoti cum recommendacione ad ejus bene placita, se ipsos cum reverencia tam debita quam devota. Noverit vestra paternitas reverenda, quod vaccante nostro monasterio predicto per mortem venerabilis patris quondam bone memorie domini Aymonis, quondam ipsius monasterii abbatis, ejusque corpore ecclesiastice tradito sepulture ac die sabbati post octabas Nativitatis beate Marie ad eligendum abbatem ipsius monasterii a nobis prefixa, vocatis omnibus qui fuerant evocandi et presentibus in capitulo nostro, ipsa die sabbati, hora competenti, omnibus qui voluerunt, debuerunt et potuerunt commode interesse, placuit nobis omnibus, universis et singulis, in ipso capitulo propter hoc congregatis ad electionem futuri abbatis, per viam compromissi procedere seu comissi, dedimusque omnes et singuli plenam potestatem religiosis et providis viris, fratri Petro de Valeriis, priori de Cella Bruerie, monacho Mauziacensis monasterii, et fratri Guillelmo de Sancto Saturnino, priori Sancti Germani, et fratri Johanni de Cortes, priori de Giaco, monachis ipsius nostri monasterii Mauziacensis, eligendi abbatem ac providendi ea vice nostro vacanti monasterio de abbate, vice sua et omnium nostrum sub forma que sequitur: «In nomine Domini. Amen. Nos frater Rotbertus, humilis prior monasterii Mauziacensis, Claromontensis diocesis, ordinis Cluniacensis, ejusdemque monasterii Deo devotus conventus per presentes litteras notum facimus universis, quod monasterio nostro predicto, etc. (ut supra usque ad:) eligendi in abbatem monasterii nostri personam ydoneam de gremio dumtaxat monasterii nostri predicti ac providendi hac vice nostro vacanti monasterio de abbate; item tamen quod si dicti tres arbitri seu comissarii non possent concordare omnes unanimiter in unam personam de gremio monasterii nostri predicti, nichil valeat quod faciant duo ex ipsis, nisi duo ex tribus arbitris seu comissariis predictis tercium coarbitrum seu comissarium suum duxerint eligendum. In quo casu ultimo, promittimus nos prior et conventus predicti habituros pro abbate et recepturos in abbatem illum ex predictis tribus arbitris seu comissariis quem duo ex ipsis tribus duxerint eligendum. In quorum omnium testimonium nos prior et conventus predicti sigilla nostra presentibus litteris duximus apponenda. Actum et datum dicta die sabbati, in capitulo Mauziacensi, anno Domini millesimo ducentesimo octogesimo sexto.» Qui predicti tres arbitri seu comissarii suscipientes in se potestatem hujusmodi seu commissum, diligenti tractatu prehabito, Spiritus Sancti invocata gracia, prout moris est, juxta potestatem et formam sibi a nobis factam, traditam et comissam et ex potestate hujusmodi sibi data a nobis, religiosum et honestum virum, providum et discretum, in spiritualibus et temporalibus circumspectum, videlicet fratrem Guillelmum de Sancto Saturnino, priorem Sancti Germani, ipsius nostri monasterii monachum, per quem jura ejusdem monasterii nostri speramus posse defendi legitime, ipsumque monasterium salubriter gubernari, duo ex predictis tribus arbitris seu comissariis, videlicet frater Petrus de Valeriis et frater Johannes de Cortes predicti, dati a nobis arbitri seu comissarii, ut predictum est, vice sua et omnium nostrum elegerunt in abbatem nostrum et monasterii nostri sub forma et tenore que sequuntur: «In nomine Domini. Amen. Ego frater Petrus de Valeriis, prior de Cella Bruherie, monachus Mauziacensis monasterii, de mandato et voluntate fratris Johannis de Cortes, prioris de Giaco, monachi monasterii Mauziacensis predicti, coarbitri seu concomissarii mei, ex autoritate et potestate nobis predictis duobus et fratri Guillelmo de Sancto Saturnino, priori Sancti Germani de Fossatis data, tradita et commissa a religiosis viris ... priore et conventu monasterii Mauziacensis et singulis de conventu qui volunt, possunt et debent interesse electioni de abbate in dicto monasterio faciende, vice et nomine mei ac vice et nomine dicti fratris Johannis de Cortes, coarbitri seu concomissarii mei, necnon vice et nomine ... prioris ac totius conventus monasterii Mauziacensis, juxta potestatem mihi et dictis duobus coarbitris seu concomissariis meis datam, factam, traditam et commissam, provideo monasterio Mauziacensi et vobis priori et conventui ejusdem monasterii de religioso viro fratre Guillelmo de Sancto Saturnino predicto et ipsum fratrem Guillelmum nomine meo ac nomine et vice et mandato predicti fratris Johannis de Cortes, coarbitri seu concomissarii mei, necnon et ... prioris ac totius conventus monasterii Mauziacensis, eligo in abbatem ipsius monasterii Mauziacensis.» Quam electionem sic factam, nos quatenus ad nos pertinet, concorditer approbantes, ipsum electum instanter rogavimus ut eidem electioni facte suum prestaret assensum, qui post deliberacionem super hoc ab ipso habitam, eidem electioni consenciit, non tamen ambiciose, set magna precum nostrarum devictus instancia et tempore competenti. Unde reverende paternitati vestre humiliter supplicamus et instanter requirimus, quatinus nostro compassientes monasterio eamdem electionem dignemini confirmare et ad petendam confirmacionem hujusmodi electionis a reverenda paternitate vestra et ad omnia alia que circa hec fuerint oportuna facimus, constituimus et ordinamus procuratores nostros ... religiosos viros fratrem Petrum de Valeriis predictum et fratrem Stephanum de Chaslhutz, priorem Sancti Ylarii, monachos ipsius monasterii nostri. Promittentes nos ratum et firmum in perpetuum habituros quicquid super premissis coram vobis per dictos procuratores nostros actum fuerit seu etiam procuratum. Et hoc vobis et omnibus quorum interest et intererit per presentes litteras intimamus, quas in testimonium premissorum sigillis nostris fecimus sigillari. Datum die sabbati post octabas festi Nativitatis beate Marie, anno Domini millesimo CC^o octogesimo sexto.

Et ego Guillelmus de Valle, sacrosancte Romane ecclesie publicus auctoritate notarius, predictis presens interfui et ad rogatum predictorum dominorum prioris et conventus Mauziacensis subscriptionem hanc una cum sigillis predictorum prioris et conventus presenti publico instrumento propria manu apposui, signoque meo signavi nomen meum proprium continente. (Signet du notaire)

Et ego prefatus Guillelmus Chapus clericus, qui predictis vocatus presens interfui et ad rogatum predictorum dominorum prioris et conventus monasterii Mauziacensis predicta omnia manu propria fideliter scripsi et auctoritate sacrosancte Romane ecclesie in hanc publicam formam redegi, signoque meo consueto signavi rogatus, una cum sigillis predictorum prioris et conventus monasterii Mauziacensis predicti.